Əmizdirmə və məhrəmlik
Müqəddəs Quranın ən-Nisə surəsi, 23-cü ayəsi: “Sizə analarınız, qızlarınız, bacılarınız, bibiləriniz, xalalarınız, qardaş qızları, bacı qızları, sizi əmizdirən süd analarınız, süd bacılarınız, arvadlarınızın anaları, yaxınlıq etdiyiniz qadınlarınızın himayənizdə olan ögey qızları – yox əgər o qadınlarla yaxınlıq etməmişsinizsə, onda bu (ögey qızlarınızla evlənməyiniz) sizə günah deyildir, öz belinizdən gələn oğullarınızın arvadları (ilə evlənmək) və iki bacını birlikdə almaq haram edildi. Olub-keçənlər isə artıq keçmişdir. Həqiqətən, Allah Bağışlayandır, Rəhmlidir.”
Süd qohumluğuna görə evlənmək qadağan olunan qadınlardan Uca Allah təkcə süd analarını və süd bacılarını qeyd edir. Nəzərə alsaq ki, qadının südü ərinin mülkiyyətinə aiddir, buradan aydın olur ki, süd anasının əri, əmizdirilmiş uşağın süd atası olur. Əgər süd anası və süd atası müəyyən edilmişsə, onda süd valideynlərinin qardaşları və bacıları və həmçinin yüksələn və enən xətlər üzrə birbaşa qohumları əmizdirilən uşağın süd qohumları olurlar.
Bu qaydaya görə süd atası da doğma ata kimidir. Eynilə qız uşağına ata tərəfdən nəsəb səbəbilə haram olanlar, süd əlaqəsi səbəbilə də haramdır. Beləliklə süd əmən qız uşağı böyüyəndə süd atasının analoji olaraq yuxarıdakı kimi süd qohumları olan kişilərlə ailə həyatı qura bilməz.
Qan qohumluğu ilə bağlı olan qadağalar nikah məsələlərində süd qohumluğuna şamil edilsə də, miras məsələlərində süd qohumları arasında heç bir vərəsəlik haqqları yoxdur. Yəni süd valideynlərininin ölümündən sonra süd uşaqlarına heç bir miras verilmir, həmçinin süd-bacı qardaşları arasında da eynilə. Peyğəmbərin (ona Allahın salavatı və salamı olsun) belə demişdir: “Mirası, ona haqqı çatanlara verin. Nə qalarsa, onu yaxın qohum olan kişiyə verin.” Hətta əgər süd valideynlərinin öləndən sonra miraslarına haqqı çatan kimsə qalmayıbsa belə, süd uşaqlarına miras verilmir. (anasüdü.az saytı tərəfindən əlavə)
Mənbə: www.islamevi.az
